படையப்பா படத்தை மறுத்த மீனா!

தேடி வந்த வாய்ப்பை மறுத்த மீனா.! சௌந்தர்யாவுக்கு அடித்த ஜாக்பாட்.! ரூ.100 கோடி வசூலித்த அந்த சூப்பர் ஹிட் படம் எது தெரியுமா?

தமிழ் திரையுலகில் முன்னணி நடிகையாக இருந்த மீனா ஒரு பட வாய்ப்பை வேண்டாம் என்று மறுத்துள்ளார். ஆனால் அந்த படம் ரூ.100 கோடிக்கும் அதிகமான வசூலை குவித்து சாதனை படைத்தது. அந்த படம் குறித்து இந்த பதிவில் பார்க்கலாம்.

மீனா மறுத்த பட வாய்ப்பு

ஒரு காலத்தில் தென்னிந்தியாவின் டாப் ஹீரோயின்களாக இருந்தவர்கள் மீனா மற்றும் சௌந்தர்யா. இருவரும் ஸ்டார் ஹீரோக்களுடன் நடித்து கலக்கினார்கள். ஆனால், மீனா வேண்டாம் என்று சொன்ன ஒரு பட வாய்ப்பு, சௌந்தர்யாவுக்கு பிளாக்பஸ்டர் ஹிட் கொடுத்தது உங்களுக்குத் தெரியுமா? அந்த சுவாரஸ்ய பின்னணி குறித்து இந்த பதிவில் விரிவாகப் பார்க்கலாம்.

முன்னணி நடிகைகளாக விளங்கிய மீனா, சௌந்தர்யா

மீனா, சௌந்தர்யா இருவரும் தென்னிந்தியாவின் பெரும்பாலான ஸ்டார் நடிகர்களுடன் நடித்திருக்கிறார்கள். தெலுங்கில் சிரஞ்சீவி, நாகார்ஜுனா முதல், தமிழில் ரஜினிகாந்த், கமல்ஹாசன் வரை பல ஜாம்பவான்களுடன் இருவரும் திரையைப் பகிர்ந்து கொண்டனர்.

சௌந்தர்யா குறித்து மனம் திறந்த மீனா

சௌந்தர்யா இளம் வயதிலேயே விமான விபத்தில் உயிரிழந்தார். ஆனால், மீனா இப்போதும் 'த்ரிஷ்யம்' போன்ற படங்களில் கதாநாயகியாகவே நடிக்கிறார். சமீபத்திய பேட்டி ஒன்றில், சௌந்தர்யா குறித்த ஒரு ஷாக்கிங் தகவலை மீனா பகிர்ந்துகொண்டார்.

படையப்பா படத்தை மறுத்த மீனா

சௌந்தர்யாவின் கரியரில் மிகப்பெரிய ஹிட் படங்களில் ஒன்று, ரஜினிகாந்துடன் நடித்த 'படையப்பா'. இந்தப் படத்தில் ரஜினிக்கு ஜோடியாக சௌந்தர்யாவும், நீலாம்பரியாக ரம்யா கிருஷ்ணனும் நடித்தனர். இந்த அப்பாவி பெண் வேடத்திற்கு முதலில் மீனாவைத்தான் படக்குழு அணுகியது.

படையப்பா கதையை மீனாவின் அம்மா நிராகரித்தார்

ஆனால், 'இந்த கேரக்டர் உனக்கு செட் ஆகாது' என்று மீனாவின் அம்மா இந்த வாய்ப்பை நிராகரித்துவிட்டாராம். இதற்கு முன் கே.எஸ். ரவிக்குமார் இயக்கத்தில் ரஜினியுடன் 'முத்து' படத்தில் மீனா நடித்திருந்தார். அதே இயக்குநர் என்பதால், 'படையப்பா'விலும் மீனாவையே நடிக்க வைக்க விரும்பினார். ஆனால், அம்மா மறுத்ததால் அந்த அதிர்ஷ்டம் சௌந்தர்யாவுக்குச் சென்றது.

படையப்பாவால் உயர்ந்த சௌந்தர்யாவின் இமேஜ்

இந்தப் படம் சௌந்தர்யாவின் இமேஜை அடுத்த கட்டத்திற்கு உயர்த்தியது. ஒருவேளை மீனா இந்த படத்தில் நடித்திருந்தால் சௌந்தர்யாவிற்கு ஒரு சிறந்த படம் கைநழுவி போயிருக்கக்கூடும். சௌந்தர்யாவின் திரை வாழ்வில் ஒரு முக்கிய படத்தை இழந்திருப்பார். சௌந்தர்யா ஏற்கனவே ரஜினியுடன் அருணாச்சலம் படத்தில் நடித்திருந்தாலும், படையப்பா படத்தின் பிரம்மாண்ட வெற்றி அவருக்கு ஒரு மிகப்பெரிய ஜாக்பாட்டாக அமைந்தது. ரஜினி-சௌந்தர்யா ஜோடி ரசிகர்களிடையே பெரும் வரவேற்பைப் பெற்றது.

நீலாம்பரி கதாபாத்திரம்

இதேபோல், வில்லி கதாபாத்திரமான 'நீலாம்பரி'யாக நடிக்க முதலில் ஐஸ்வர்யா ராய், சிம்ரன், நக்மா போன்ற முன்னணி நடிகைகள் பரிசீலிக்கப்பட்டனர். இறுதியில் அந்த வாய்ப்பு ரம்யா கிருஷ்ணனுக்குச் சென்றது. அது அவரது திரைப்பயணத்தையே மாற்றியமைத்தது.

படையப்பா செய்த வசூல்

1999 ஆம் ஆண்டு வெளியான படையப்பா சுமார் ரூ.70 கோடி அளவில் வசூலை குவித்தது. (இன்றைய பணமதிப்பின்படி இது 100 கோடி ரூபாய்க்கும் அதிகமான ஒரு பிரம்மாண்ட வெற்றியாகக் கருதப்படுகிறது). தமிழ்நாட்டில் ரூ.30 கோடியும், வெளிநாடுகளில் ரூ.20 கோடியும், தெலுங்கில் சுமார் ரூ.15 கோடி வசூலையும் பெற்று சாதனை படைத்திருந்தது. 2025 ஆம் ஆண்டு இந்த படம் ரீ ரிலீஸ் செய்யப்பட்டது. அப்போது முதல் நாள் ரூ.6 கோடி வசூலையும், பின்னர் மொத்தமாக ரூ.20 கோடிக்கும் அதிகமான வசூலையும் குவித்திருந்தது குறிப்பிடத்தக்கது.

இருவரின் வாழ்விலும் நிகழ்ந்த சோகம்

சௌந்தர்யா அரசியலுக்கு வந்த சில நாட்களிலேயே விபத்தில் இறந்தார். மீனா தன் கணவர் வித்யாசாகரை 2022-ல் கொரோனா தொற்றால் இழந்தார். அதன்பின், தனுஷுடன் இரண்டாவது திருமணம் என வதந்திகள் பரவின. 'இந்த மாதிரி செய்திகளை எங்கிருந்துதான் கிளப்புறாங்களோ' என மீனா வருத்தத்துடன் விளக்கம் அளித்தார்.

தேன் மொழி

மயில்சாமி பென்ஸ் காரை தொட்டு பார்த்ததற்காக !

 

மயில்சாமி பென்ஸ் காரை தொட்டு பார்த்ததற்காக “அந்த” ஆளு அடிச்சாரு.. பல வருட ரகசியத்தை உடைத்த நடிகர்

மறைந்த மயில்சாமி நிகழ்ச்சி ஒன்றுக்கு வெளியே போயிருந்த நிலையில் அங்கு இருந்த பென்ஸ் காரை பார்த்து வியந்து போய் அதை தொட்டதற்காக அங்கு பிரச்சனை ஏற்பட்டு அந்த காரின் உரிமையாளர் அவரை அடித்துவிட்டார் என்ற ரகசியத்தை பல வருடங்கள் கழித்து பிரபல நடிகரான ஆர் ஜே பாலாஜி கூறி இருக்கிறார்.

சாதாரண மக்களாக இருந்தாலும் சரி சின்ன சின்ன நடிகர்களாக இருந்தாலும் சரி கார் என்பது எல்லோருக்கும் கனவுதான். சிலருக்கு ஆடம்பரமாகவும் பலருக்கு அது அடிப்படையாகவும் மாறிக்கொண்டிருக்கிறது. அதே நேரத்தில் தங்களுக்கு மனதிற்கு பிடித்த காரை வாங்க முடியவில்லை என்றாலும் அது தங்கள் கண்முன்னே போகும்போது ஒரு இனம் புரியாத ஒரு சந்தோஷம் பலருக்கு ஏற்படத்தான் செய்யும் .

அந்த வகையில் பல நடிகர்கள் படப்பிடிப்பு தளத்திற்கு கூட தயாரிப்பு நிறுவனம் காரில் தான் போக முடியும். சினிமாவில் நடித்து வரும் பல நடிகர்களுக்கு கார் கிடையாது. அதனால் அவர்களுக்கான கார் வாங்குவது ஒரு பெரிய லட்சியமாக வைத்திருக்கின்றனர். அந்த அதுபோல மறைந்த நடிகர் மயில்சாமிக்கும் பெரிய ஆசை இருந்திருக்கிறது. நடிகர் மயில்சாமி பல திரைப்படங்களில் நடித்து பிரபலமடைந்திருக்கிறார்.

அதுபோல சின்ன சின்ன நடிகர்களுக்கும் பொதுமக்களுக்கும் கூட தன்னால் முடிந்த உதவிகளை செய்து இருக்கிறார். அதனால் தான் அவருடைய மறைவுக்கு பலரும் அவர் செய்த உதவிகளை சொல்லி ஃபீல் பண்ணி இருந்தனர். இப்போ வரைக்கும் அவருடைய மறைவை ஏற்றுக் கொள்ளாத ரசிகர்கள் இருக்கத்தான் செய்கின்றனர். சில மாதங்களுக்கு முன்பு புயல் பாதிப்பு ஏற்பட்ட போது கூட மயில்சாமி வாழ்ந்த பகுதி மக்கள் எல்லாரும் மயில்சாமி இருந்திருந்தால் எங்களுடைய நிலைமை நல்லா இருந்திருக்கும்.

எங்களுக்கு சில உதவிகளை அவர் செய்திருப்பார் என்று ஃபீல் பண்ணி பேசி இருந்தனர். அந்த அளவிற்கு மயில்சாமி பலருக்கும் உதவி செய்திருந்தாலும் அவருடைய வாழ்க்கையிலும் சில அவமானங்கள் ஏற்பட்டிருக்கிறது.. ஒருமுறை மயில்சாமி ஒரு இடத்தில் நின்று கொண்டிருந்த பென்ஸ் காரை ஆசையாக தொட்டு பார்த்திருக்கிறார்.

அப்போது அந்த காரின் சொந்தக்காரருக்கும் அவருக்கு வாக்குவாதம் ஏற்பட்டிருக்கிறது. காருக்கு சொந்தக்காரர் மயில்சாமியை எப்படி என் காரின் மீது கை வைக்கலாம் என்று கேட்டு பிரச்சனை செய்ய அதற்கு ஆரம்பத்தில் மயில்சாமி பொறுமையாக பேசிக் கொண்டிருந்தாலும் பிறகு இருவருக்கும் வாக்குவாதம் ஏற்பட்டு இருக்கிறது.

அப்போது காரின் சொந்தக்காரர் மயில்சாமியை அடித்துவிட்டாராம். ஆனால் அதே மயில்சாமிக்கு அவருடைய ஐம்பதாவது பிறந்த நாளில் அவரின் மனைவி மற்றும் உறவினர்கள் சேர்ந்து அவருக்கு ஒரு பென்ஸ் காரை பரிசாக வாங்கி கொடுத்தார்கள் என்று ஆர்.ஜே பாலாஜி பேட்டி ஒன்றில் நிகழ்ச்சியோடு பேசி இருக்கிறார். அந்த மாதிரி தான் யாருக்கு எப்போது வாழ்க்கை மாறும் என்று சொல்ல முடியாது .

முகநூல் பதிவு- பிரசாந்த் 🥀

ஆறிலிருந்து அறுவது வரை....1979

 

ஆறிலிருந்து அறுவது வரை....1979 !

பி.ஏ.ஆர்ட் புரொடக்‌ஷன்ஸ் தயாரித்த படம் இது.

பஞ்சு அருணாசலம் தயாரிப்பாளர். படத்தின் கதை, வசனம், பாடல்களை பஞ்சு அருணாசலம்தான் எழுதியிருந்தார்.

🌹வீட்டுக்கு வரும் வழியில்

ஒரு பெண்ணைக் காப்பாற்றுவார். ‘புள்ளகுட்டிங்களோட நீங்க நல்லாருக்கணும்’ என்று ரஜினியை வாழ்த்துவார் அந்தப் பெண்.

வீட்டுக்கு வந்தால், மனைவி படாபட் இறந்துவிடுவார். ’அந்த அம்மா,புள்ளகுட்டிங்களோ நல்லா இருன்னுதான் சொன்னா.

பொண்டாட்டி புள்ளைங்களோட நல்லா இருன்னு சொல்லலையே...’ என்று அழுவார் ரஜினி. ஒரு சாதாரண வார்த்தை, மிகப்பெரிய ரணத்தை ஏற்படுத்திவிடும் நமக்கு!

ரஜினி, ஜெயா, சங்கீதா, படாபட் ஜெயலட்சுமி, சோ, சுருளிராஜன் முதலானோர் நடித்திருந்தார்கள்.

படத்தில் உள்ள பாடல்களும் பின்னணி இசையும் தனி ரகம்.

*‘கண்மணியே காதல் என்பது கற்பனையோ’ என்ற பாடல் இன்றைய இரவுப் பாடல்களின் பட்டியலில் டெளன்லோடு செய்யப்பட்டு, எத்தனையோ பேரின் செல்போனுக்குள் காவியம் படைத்துக் கொண்டிருக்கின்றன.

பஞ்சு அருணாசலம் படம். இசை இளையராஜா என்று சொல்லவேண்டுமா என்ன?

ஸ்ரீநிவாஸ்..

மலேசியா வாசுதேவன் !

மெலடி ( மலேசியா ) வாசுதேவன்

எஸ்பிபியின் நிழலில் மனோவும், யேசுதாஸின் நிழலில் ஜெயச்சந்திரனும் மறைக்கப்பட்டிருந்தாலும், யாராலும் மறைக்க முடியாத தனித்துவமான குரல் மலேசியா வாசுதேவனுடையது, ஆனால் அந்தந்த நேரத்தில் அவர் புகழுக்கேற்றபடி கொண்டாடப்பட்டாரா என்றால் இல்லை.

இன்று 2கே கிட்ஸ் கொண்டாடிய அளவுக்கு 'பேர் வச்சாலும்…' பாடலை வேறு யாரும் கொண்டாடிவிடவில்லை. ஆனாலும் அவருடைய குரலின் அத்தனை கோணங்களையும் தமிழ் மக்கள் கண்டனர் என்றுதான் கூறவேண்டும்,

அவர் கவனிக்கப்படாமல் போனவர் அல்ல! அவருடைய சிறப்பம்சமே அவர் குரலில் ததும்பும் கொண்டாட்ட தொனி தான். அதற்காகவே எண்ணற்ற குத்துப்பாடல்கள், கொண்டாட்டப் பாடல்கள், பக்திப்பாடல்களை பாடவைத்து ரசித்திருக்கிறது தமிழ் சமூகம்.

"நெஞ்சுக்குள் அச்சம் இல்லை

யாருக்கும் பயமும் இல்லை

வாராதோ வெற்றி நிச்சயம்…"

என அவர் பாட அதை கேட்கும்போதே நெஞ்சுக்குள் வீரம் பொங்கி, முரட்டுக்காளை ரஜினியாக மாறும் வல்லமை கொண்டது அவர் குரல்.

இது மட்டுமல்ல, ஆசை நூறுவகை, சிங்கமொன்று புறப்பட்டதே போன்ற பல மாஸ் பாடல்கள் ரஜினி திரைப்படங்களில் பாடியுள்ளார். இப்படி தமிழில் கிட்டத்தட்ட 8,000 பாடல்களுக்கு மேல் பாடிய இவரது குரல் ஒலிக்காத விசேஷங்கள் இன்றும் இல்லை அன்றும் இல்லை.

ஏன் இவர் குரல் அவ்வளவு தனித்துவம் உடையது என்றால், யேசுதாஸ், எஸ்பிபி போன்ற வளைவான குரல் அல்ல இவருடையது. நாமோ, நம் தந்தையோ பாடினால் யதார்த்தமாக வரும் குரல் என்பதாலேயே இதயத்துடன் அவ்வளவு நெருங்கி வருகிறார்.

இது இளையராஜாவுக்கும் தெரியும். 'பூவே இளைய பூவே' பாடலின் இன்டர்லூடில் இளையராஜா தனது ராஜ்யத்தை நடத்திக் கொண்டிருப்பார், சரணம் வந்ததும் எல்லாவற்றையும் முடிப்பார், வாசுதேவனின் குரல் மட்டும் மேலோங்கும்.

'குழல் வளர்ந்து அலையானதே

இரவுகளின் இழையானதே

விழியிரண்டு கடலானதே

எனது மனம் படகானதே…'

என அந்த வரிகளில் அவர் குரலுக்காகவே உருகியவர்கள் பலர்.

மலேசியா வாசுதேவன் என்றாலே, மாரியம்மா மாரியம்மா, தண்ணி கருத்துருச்சு, காதல் வைபோகமே, ஊரு விட்டு ஊரு வந்து போன்ற குத்துப்பாடல்கள், பக்திப் பாடல்கள்

பலருக்கு நியாபகம் வரலாம். ஆனால் பல உள்ளம் நெகிழவைக்கும் குரலை பல மெலடி பாடல்களுக்கும், சோகப்பாடல்களுக்கும் கொடுத்தவர்தான் வாசுதேவன்.

முதல் மரியாதை திரைப்படத்தில், 'பூங்காற்று திரும்புமா', 'வெட்டிவேரு வாசம்', தர்ம யுத்தம் திரைப்படத்தில் 'ஒரு தங்க ரத்தத்தில்', விடியும் வரை காத்திரு திரைப்படத்தின், 'நீங்காத எண்ணம் ஒன்று', தூறல் நின்னு போச்சு திரைப்படத்தின், 'தங்கச்சங்கிலி மின்னும் பைங்கிளி', நிறம் மாறாத பூக்கள் திரைப்படத்தின், 'ஆயிரம் மலர்களே', கிழக்கே போகும் ரயிலின் 'கோவில் மணி ஓசை தன்னை' போன்ற பல உருகவைக்கும் பாடல்களை பாடியுள்ளார். அதில் அவர் குரலே ஓங்கி நிற்கும் என்பதுதான் தனிச்சிறப்பு.

1985இல் சின்ன வீடு என்ற பாக்யராஜ் திரைப்படத்திற்கும், முதல் மரியாதை திரைப்படத்திற்கு இசையமைக்கிறார் இளையராஜா. இரண்டிலும் கிட்டத்தட்ட ஒரே சிச்சுவேஷன், ஆனால் முற்றிலும் வேறு வேறு ஸீன். பாக்யராஜ் தன் மனைவியை விட்டு வேறு பெண் மீது மையல் கொள்வதையும், சிவாஜி பாடும் பாட்டிற்கு ராதா எசப்பாட்டு பாடும் முதல் பாடலும்தான் அது. இரண்டிற்கும் இசை அளவில் அவரால் முடிந்த வேறுபாட்டை இளையராஜா கொடுத்தார் ஆனால் இரண்டு பாடலுக்கும் அடிநாதம் 'என்டர் இன்டு தி நியூ லைஃப்' எனப்படும் ஒரு 200 வருட பழைய சிம்ஃபனி தான். இருவருமே புதிய ஒரு வாழ்க்கைக்குள் செல்வதால், 'ஏ குருவி, சிட்டுக்குருவி' பாடலிலும், 'சிட்டுக்குருவி வெட்கப்படுது' பாடலிலும் வேண்டுமென்றே பயன்படுத்தினார் இளையராஜா.

ஆனால் அந்த இரு பாடல்களும் ஒன்றென தெரியாததற்கு பெரும் காரணம் வாசுதேவனின் தனித்துவமான குரல், மற்றொன்றை எஸ்பிபி பாடினார். இந்த வேறுபாட்டை கொடுக்க அப்போது இளையராஜாவுக்கு இருந்த ஒரே துருப்புச்சீட்டு வாசுதேவன் தான்.

அந்த வேறுபாட்டை பெரிதும் ரசித்தவரும் கூட என்று சொல்லலாம். 'ஏ ராசாத்தி', என்ற பாடல் அந்த காலத்தில் கிட்டத்தட்ட ஒரு 'ஆக்கப்பெல்லா' தான். அவ்வளவு வித்யாசமாக வாசுதேவன் குரலை பயன்படுத்தி இருப்பார் இளையராஜா. வாசுதேவன் அவரால் முடிந்த அளவிற்கு எல்லா கோணங்களையும் அந்த பாடலில் கொடுத்திருப்பார். அதே போல அவரது குரலின் முற்றிலும் வேறு கோணத்தை எடுத்தது 'ஆட்டுக்குட்டி முட்டையிட்டு பாடல்'. கிட்டத்தட்ட மிமிக்ரி செய்து பாடியது போலவே இருக்கும், அந்த பாடலில் சப்பாணி கதாபாத்திரத்திற்கு அவ்வளவு பொருத்தமான குரலை வேறு யாராலும் தந்திருக்க முடியாது. முக்கியமாக இரண்டு ஹீரோக்கள் இணைந்து பாடும் பாடல்களுக்கு பெரிதும் இளையராஜா விரும்புவது வாசுதேவனை தான்.என்னம்மா கண்ணு சவுக்யமா பாடலாகட்டும், தென்மதுரை வைகை நதி பாடலாகட்டும். ரஜினிக்கு எஸ்பிபி வாய்ஸ் என்றால், அடுத்து இருப்பவருக்கு மலேசியா வாசுதேவன் என்பது இளையராஜா வைத்திருந்த எழுதப்படாத விதி.

படித்ததில் பிடித்தது - - - - - - -

இயக்குனர் மகேந்திரன்!

இயக்குனர் மகேந்திரன் எப்படிப்பட்ட வித்தியாசமான படைப்புகளைத் தந்தவர் என்பது நமக்குத் தெரியும். வசனகர்த்தாவாக இருந்த காலகட்டத்தில பக்கம் பக்கமாக வசனம் எழுதிய அவர் ஒரு இயக்குனர் ஆனதற்குப் பின்னால திரைமொழி என்பது வசனம் அல்ல என்பதை சரியாகப் புரிந்து கொண்டார். அதே நேரம் மிகச்சரியாக தன்னோட படங்கள்ல திரைமொழியைக் கையாண்டார்.

அப்படி அவர் உருவாக்கிய படங்கள் தான் உதிரிப்பூக்கள், முள்ளும் மலரும், கூத்தாடும் கூத்துக்கள் போன்ற படங்கள். ஒரு படைப்பாளி என்ற நிலையைத் தாண்டி படைப்புகளை விமர்சனம் செய்யும் விமர்சகராகவும் ஒரு காலகட்டத்துல மகேந்திரன் இருந்தார்.

அப்படி விமர்சனக் கலையிலே அவர் மிகச்சிறப்பாகப் பணியாற்ற முடிந்தது என்றால் அதற்கு மிக முக்கியக் காரணம் இயக்குனர் பிஎன்.ரெட்டி. அவரிடம் தான் அதற்குரிய பாடங்களைப் படித்தார் மகேந்திரன். இவரது பேராசிரியரான ரங்கன் பிஎன்.ரெட்டியின் மிகப்பெரிய விசிறி. அதன் காரணமாகவே அவருடன் நல்ல ஒரு பழக்கம் ஏற்பட்டு இருந்தது. அந்தப் பழக்கத்தின் அடிப்படையிலே மகேந்திரனுக்கு ஒரு கடிதம் எழுதி, அதில் பிஎன்.ரெட்டியைப் பார்க்கும்படிச் சொன்னார் ரங்கன்.

அந்தக் கடிதத்துடன் பிஎன்.ரெட்டியைப் போய் பார்த்தபோது, வயதில் இளையவராக இருந்தாலும் அப்படி ஒரு மரியாதையைக் கொடுத்து உபசரித்ததோடு மட்டும் இல்லாமல், தன்னோட தயாரிப்புகளில் உருவான பல படங்களை எனக்காகப் போட்டுக் காட்டச் சொன்னார் பிஎன்.ரெட்டி. அந்த அனுபவங்களை என்னால் மறக்க முடியாது. படங்களைப் போட்டுக் காமிச்ச உடனே நான் அவரது அலுவலகத்துக்குப் போவேன். அங்கு 12 மணி வரை அந்தப் படத்தைப் பற்றிப் பேசுவேன். நான் பார்த்த படங்களில் பல காட்சிகள் எப்படி உருவாக்கப்பட்டது?

எதனால் அந்தக் காட்சி அமைக்கப்பட்டது என்பது பற்றியும் பல விளக்கங்களை பிஎன்.ரெட்டி என்னிடம் சொல்லி இருக்கிறார். நான் திரையுலகில் நன்றாக செயல்படவும், விமர்சனங்களை ஓரளவுக்கு நன்றாக எழுதவும் காரணமாக அமைந்ததுன்னா அன்றைக்கு பிஎன்.ரெட்டி எனக்கு எடுத்த பாடங்கள் தான் என்று ஒரு பத்திரிகைப் பேட்டியில் பதிவு செய்துள்ளார் இயக்குனர் மகேந்திரன். மேற்கண்ட தகவலை பிரபல தயாரிப்பாளர் சித்ரா லட்சுமணன் தெரிவித்துள்ளார்.

வாழ்க்கை ஒரு வட்டம் மேலே இருப்பவன் கீழே போவதும் ! கீழே இருப்பவன் மேலே வருவதும் உலக இயல்பு தானே !

 

வாழ்க்கை ஒரு வட்டம் மேலே இருப்பவன் கீழே போவதும் ! கீழே இருப்பவன் மேலே வருவதும் உலக இயல்பு தானே !

பதினாறு வயதினிலேயே சூட்டிங் ...

அப்போது, 4 வகையான உணவு வருமாம்.

முதல் தரம் கமலுக்கானது,

இரண்டாவது தரம் இயக்குனர் பாரதிராஜாவுக்கானது,

மூன்றாவது தரம் ஸ்ரீதேவி உடையது.

மற்றவர்களுக்கு 4வது தர சாப்பாடு. தரம் என்பது, உணவு வகைகளை பொருத்தது.

ரஜினி தினமும் சூட்டிங் வருவாராம்; தொடர்ந்து 10 நாட்கள் அவருக்கு காட்சியே தரவில்லை.

உண்மையில் அப்போது ரஜினியின் நிலையும் அது தான்

கமல், ஸ்ரீதேவிக்கு அப்போதெல்லாம்

இலட்சங்களில் சம்பளம்,

ரஜினிக்கு அந்த படத்தில் மூன்று ஆயிரம் சம்பளம்

மற்றவர்களை போல அவரை அழைத்து வர அங்கு காரெல்லாம் வராது. அவராக எதையாவது பிடித்து சூட்டிங் ஸ்பாட் வந்து சேர வேண்டும். இதையெல்லாம் கடந்து மதியம் ஒருநாள் உணவுக்காக புரொடக்ஷனில் அமர்ந்துள்ளார்.

அவருடன் மேலும் பல துணை நடிகர்களும் அமர்ந்திருந்திருக்கிறார்கள். அப்போது அசைவ உணவு கொண்டு வந்ததை அறிந்த ரஜினி, பரிமாறுபவர்களிடம், ‛முட்டை இருந்தா தாங்க...’ என்று கேட்டுள்ளார்.

‛இப்போ தான் கோழி அடைப்பு எடுத்திருக்கிறது...’ என கிண்டலாக பதிலளித்து, மறுத்து கடந்திருக்கிறார் அங்கு பரிமாறிய நபர். ரஜினி கேட்ட ஒரு முட்டையை அவர் தர மறுத்திருக்கிறார்.

காலங்கள் கடந்தது. ரஜினி...

பெரிய ஹீரோ என்பதை கடந்து,

சூப்பர் ஸ்டாராக நிற்கிறார். பிறகு ஒருபடத்தில் சூட்டிங்கில் 16 வயதினிலே படத்தில் பணியாற்றிய அதே பரிமாறிய நபர், முதல் தர உணவை ரஜினிக்கு பரிமாறியுள்ளார். அந்த நபரை அடையாளம் கண்ட ரஜினி, ‛முட்டை இருக்கிறதா...’ என்று கேட்டுள்ளார். அந்த நபரோ... ‛இதோ... இப்போ கொண்டு வர்றேன்...’ என ஓட முயற்சித்துள்ளார்.

உடனே அவரை அழைத்த ரஜினி, ‛கோழிக்கு இப்போ அடைப்பு எடுக்கலையா...’ என கிண்டலடிக்க, எதிரில் இருந்த நபருக்கு முகத்தில் ஈ ஆடவில்லை. ரஜினி பழசை மறக்கவும் இல்லை;

தன்னை ஒதுக்கப்பட்ட இடத்தில் கடின உழைப்பால் முன்னேறி வெற்றி யால்

பதிலடி கொடுத்தவர் ரஜினி

இன்றும் ஷுட்டிங் கில் சகமனிதனாக

அனைவருடனும் அமர்ந்து சாப்பிடுவது,

எல்லோரும் சாப்பிட்டார்களா என கேட்பார்

என்று அவருடன் பணியாற்றிவர்கள் சொல்ல கேட்டேன்

தான் கடந்த வந்த பாதை எதையும் மறக்காததால் தான் அவர் இன்றைக்கு இவ்வளவு முன்னேறவும் முடிந்தது.

யாரையும் எப்போதும் இவன் இப்படி தான் என்று

கணிக்க கூடாது என்பது நான் வாழ்க்கையில் கற்ற பாடம் என்று சொல்கிறார்.

உண்மை அது தானே!

முகநூல் பதிவு-பிரசாந்த்!

தஞ்சை பெரிய கோயில் !

 

தஞ்சை பெரிய கோயில் கட்டி முடிக்க பட்டு குட முழுக்கு கும்பாபிஷேகத்துக்கு நாளும் குறிக்கப்பட்டு விட்ட நேரம் அது...

கோயில் எதிர்பார்த்தபடி நல்லபடியாய் கட்டி முடிக்க பட்ட சந்தோஷத்தில் ராஜா, ராஜ ராஜ சோழன் நிம்மதியா தூங்கும் போது... கனவில் இறைவன் ஆன பரமசிவன் அவன் முன்னே எழுந்தருளினார்.

'ராஜா ராஜா!' என்றழைக்க...

ராஜா ராஜா சோழன், "இறைவா என் பாக்கியம் என்னவென்று சொல்வது... தாங்கள் எனக்கு காட்சி தந்தது நான் செய்த பாக்கியம்...

தங்களுக்கு நான் கட்டிய கோயில் எப்படி இருக்கிறது?... இந்த ஊரிலே எல்லோரும் வியந்து பார்க்கும் மிக பெரிய கோயிலாக கட்டியுள்ளேன்... அதற்க்கு 'தஞ்சை பெரிய கோயில்' என்று பெயர் சூட்ட போகிறேன்... மகிழ்ச்சி தானே தங்களுக்கு?" என்று கேட்டான் ஆனந்தமாக.

இறைவன் சிரித்து கொண்டே, "ம்ம்ம் மிகவும் ஆனந்தமாக இருக்கிறோம்... ஒரு மூதாட்டியின் காலடி நிழலின் கீழ் யாம் மிகவும் ஆனந்தமாக இருக்கிறோம்..." என்று கூறி மறைந்தார்.

ராஜா ராஜனின் கனவும் கலைந்தது.

விழித்தெழுந்த ராஜா ராஜன் தான் கண்ட கனவை பற்றி மறுநாள் அரசவையில் கூறி அந்த கனவுக்கு விளக்கம் கேட்டான்.

யாருக்கும் பதில் தெரியவில்லை.

பின் நேராக கட்டி முடிக்க பட்ட தஞ்சை பெரிய கோயிலுக்கு சென்றான்.

கோயில் சிற்ப்பியிடம் தான் கண்ட கனவை கூறி விளக்கம் கேட்டான்.

சிற்பி தயங்கியவாறே, "அரசே கடந்த மூன்று மாதங்களாக மோர் விற்கும் வயதான ஒரு ஏழை மூதாட்டி தினமும் மத்திய வேளையில் இங்கு வருவார்... ஏழ்மை நிலையில் இருந்தாலும் தன் பங்குக்கு இந்த கோயிலுக்கு ஏதாவது செய்யவேண்டும் என்று எண்ணி தான் விற்கும் மோரில் பாதியை காசுக்காகவும், பாதியை இந்த கோயிலுக்காக வேலை செய்யும் எங்களுக்கு குடிக்க இலவசமாக கொடுப்பார்... நாங்கள் காசு கொடுத்தாலும் வாங்க மறுத்து விடுவார்.

எதோ இந்த ஏழை கிழவியால் இந்த கோயிலுக்கு செய்ய முடிந்த தொண்டு என்று கூறி காசு வாங்க மறுத்திடுவார்.

இப்படி இருக்கும் போது போன வாரத்தில் ஒரு நாள், ஆலய சிற்பங்களின் எல்லா வேலையும் முடித்த எங்களுக்கு இறைவனின் கருவறையின் மேலிருக்கும் கல்லை மட்டும் சரி செய்யவே முடியவில்லை... நாங்களும் அதன் அளவை எவ்ளவோ முயற்சி செய்து அளவெடுத்து வைத்தாலும் ஒன்று கல் அளவு அதிகமாக இருந்தது அல்லது குறைவாக இருந்தது.

எங்கே ஆலய பணி நடக்காமல் போய்விடுமோ என்று நாங்கள் கவலையுடன் இருந்தோம்...

அப்பொழுது இந்த மோர் விற்கும் மூதாட்டி வந்து மோர் கொடுத்து கொண்டே, 'ஏன் கவலையாய் இருக்குறீர்கள்?' என்று கேட்டார்கள். நாங்களும் கல் சரி ஆகாத விஷயத்தை சொன்னோம்.

அதற்க்கு அவர்கள் என் வீட்டு வாசற்படியில் பெரிய கல் ஒன்று உள்ளது... நான் அதை தான் என் வீட்டுக்கு வாசற்படி போல் வைத்துள்ளேன். அதை வேண்டுமானால் எடுத்து பொருத்தி பாருங்கள் என்றார். நாங்களும் நம்பிக்கை இல்லாமல் அந்த மூதாட்டி சொன்ன கல்லை எடுத்து வந்து பொருத்தினோம்...

என்ன ஆச்சிரியம்! கருவறையின் மேற் கூரைக்கு அளவெடுத்து வைத்தது போல் மிக சரியாக இருந்தது.

அதைதான் இறைவன் தாங்களுக்கு உணர்த்தி இருப்பார் என்று அடியேன் நினைக்கிறன்... என்றான் சிற்பி.

இதை கேட்டதும் ராஜா ராஜனுக்கு எல்லாம் புரிந்தது...

எவ்வளவு பொருள் செலவு செய்து கோயில் கட்டினாலும் இறைவன் நேசிப்பது அன்பான ஒரு ஏழையின் பக்தியை தான்.

ஆரவாரமாக பொருள் செலவு செய்து நான் கோயிலை கட்டினாலும், அமைதியாக ஏழ்மை நிலையிலும் அந்த மூதாட்டி விற்க இருந்த மோரை கோயில் திருப்பணி செய்வோருக்கு அர்ப்பணித்தாரே..."

என்று கண்ணீர் மல்கி...

பின் சுதாரித்து தன் அமைச்சரை அழைத்து, "அமைச்சரே கும்பாபிஷேகம் நடக்கும் நன்னாளில் அந்த மூதாட்டியை அரண்மனைக்கு அழைத்து வாருங்கள்... நான் வெண்குடை ஏந்தி அந்த அம்மையாரை வைத்து கும்பாபிஷேகம் நடத்த ஏற்பாடு செய்யுங்கள்...

இந்த கோயில் கட்டியது அந்த அம்மையார் தான்... நான் அல்ல...

இதற்கு இறைவனே சாட்சி என்றான்..."

படித்ததில் பிடித்தது