‘தம்பிக்கு எந்த ஊரு’ ரஜினிகாந்தின் நகைச்சுவை நடிப்பு !

 

மாட்டு சாணி அள்ளுறேன்.. இதெல்லாம் எனக்கு செட் ஆகாது!’ படத்தை நிறுத்த நினைத்த ரஜினி!! ‘நஷ்டம் வந்தா நான் பார்த்துக்கிறேன்’ என்ற பஞ்சு அருணாச்சலம்.. மருத்துவமனையில் விசிலடித்து பிறந்த ‘காதலின் தீபம் ஒன்று’!

1984ஆம் ஆண்டு வெளியான ‘தம்பிக்கு எந்த ஊரு’ ரஜினிகாந்தின் நகைச்சுவை நடிப்பை ரசிகர்களிடம் இன்னொரு கட்டத்திற்கு கொண்டு சென்ற முக்கியமான படம். ராஜசேகர் இயக்கத்தில் மாதவி, சுலக்‌ஷனா, செந்தாமரை, வினு சக்கரவர்த்தி, சத்யராஜ் உள்ளிட்டோர் நடித்திருந்தனர். பணக்கார வீட்டில் செல்லமாக வளர்ந்த பாலு, வாழ்க்கையின் மதிப்பை தெரிந்துகொள்ள கிராமத்திற்கு அனுப்பப்படுவதுதான் கதையின் அடிப்படை. ஆனால் சில நாட்கள் படப்பிடிப்பு நடந்த பிறகு, இந்தப் படமே தனக்கு சரியாக வராது என்று ரஜினியே சந்தேகப்பட ஆரம்பித்திருக்கிறார்.

கதையை முதலில் கேட்டபோது ரஜினி நடிக்க சம்மதித்திருந்தார். ஆனால் கிராமத்து காட்சிகள் எடுக்க ஆரம்பித்த பிறகு அவருக்கு ஒரு குழப்பம் வந்திருக்கிறது. “லவ் படம் என்று சொன்னீர்கள்... மாதவி ஹீரோயின் என்று சொன்னீர்கள். ஆனால் இங்கே நான் மாட்டு சாணி அள்ளுகிறேன்; மாட்டின் வாலை தூக்கி நேரம் பார்க்கிறேன். எனக்கான படம் மாதிரியே தெரியவில்லையே?” என்று தயாரிப்பாளர்–கதாசிரியர் பஞ்சு அருணாச்சலத்திடம் நேரடியாகவே கேட்டதாக பின்னர் பதிவுகள் தெரிவிக்கின்றன. அப்போது ரஜினி முழுமையான அதிரடி நாயகனாக வளர்ந்து கொண்டிருந்ததால் அவரது சந்தேகமும் சாதாரணமானதுதான்.

அதற்கு பஞ்சு அருணாச்சலம் சொன்ன பதில்தான் ரஜினியின் அடுத்த பல படங்களுக்கே ஒரு பாடமாக மாறியது. “எல்லா ஹீரோக்களுக்கும் மூன்று சண்டை வைக்கிறோம்; நீ ஆக்‌ஷன் ஹீரோ என்பதால் ஐந்து சண்டை வைக்கிறோம். இப்படியே போனால் இன்னும் பத்து வருடத்தில் எத்தனை சண்டை வைப்பது? 14 ரீல் படம் என்றால் 14 சண்டை போடுவாயா?” என்று கேள்வி கேட்டிருக்கிறார். அதனால் சண்டையை மட்டும் நம்பாமல், உனக்குள் இருக்கும் நகைச்சுவையையும் ரசிகர்களுக்கு காட்ட வேண்டும் என்று ரஜினியிடம் கூறியிருக்கிறார்.

ரஜினியோ உடனே, “நான் ‘தில்லு முல்லு’ செய்திருக்கிறேன்; ஆனால் அது இந்தியில் ஏற்கனவே வெற்றி பெற்ற கதை. அதுவும் பாலச்சந்தர் சாருக்காக செய்த படம்” என்று பதில் கூறியிருக்கிறார். அதைக் கேட்ட பஞ்சு அருணாச்சலம், “இந்த படம் ஓடவில்லை என்றால் யாருக்கு நஷ்டம்?” என்று கேட்டார். “உங்களுக்குத்தான்” என்று ரஜினி சொன்னதும், “அந்த நஷ்டத்தை நான் பார்த்துக்கொள்கிறேன். நீ நான் சொல்வதை மட்டும் நம்பி நடி; உன் கடைசி படம் வரைக்கும் காமெடி செய்யாமல் இருக்க முடியாது” என்று உறுதியாக கூறியதாக இந்த சம்பவம் பதிவு செய்யப்பட்டுள்ளது.

அதன்பிறகுதான் பாலு கதாபாத்திரத்தில் ரஜினி முழுமையாக இறங்கியிருக்கிறார். மாட்டை பார்த்து பயப்படுவது, கிராமத்து வேலைகளை செய்யத் தெரியாமல் தவிப்பது, வீட்டை பூட்டிக்கொண்டு புத்தகம் படிக்கும்போது பாம்பு மேலே ஊர்வதை கவனிக்காமல் இருப்பது போன்ற காட்சிகளில் அவரது இயல்பான நகைச்சுவை பெரிய அளவில் வெளிப்பட்டது. குறிப்பாக பாம்பை பார்த்ததும் பெயரை சொல்ல முடியாமல் உடல் மொழியால் மற்றவர்களுக்கு புரிய வைக்க முயலும் காட்சி படம் கடந்தும் பிரபலமானது. பின்னாளில் ரஜினியின் படங்களில் நகைச்சுவை தனியான முக்கிய அம்சமாக மாறியதற்கு இந்தப் படம் பெரிய திருப்பம் என்று பலரும் குறிப்பிடுகின்றனர்.

படத்தின் தலைப்பே ஆரம்பத்தில் ‘தம்பிக்கு எந்த ஊரு’ கிடையாது. முதலில் ‘நானே ராஜா நீயே மந்திரி’ என்ற பெயர்தான் தேர்வு செய்யப்பட்டிருந்ததாக தயாரிப்பு பதிவுகள் கூறுகின்றன. பின்னர் கடைசி நேரத்தில் அதை மாற்றி ‘தம்பிக்கு எந்த ஊரு’ என்று வைத்திருக்கிறார்கள். கதையின் முதல் பாதியில் நகரத்து பணக்கார இளைஞனாக ஸ்டைலாக வரும் ரஜினி, கிராமத்திற்கு சென்றதும் சாதாரண வேட்டி–சட்டையில் வேலை செய்யும் இளைஞனாக மாறுவது தலைப்புக்கும் கதாபாத்திர மாற்றத்துக்கும் சரியாக பொருந்தியது.

ஆனால் படத்தின் மிகப்பெரிய சுவாரசியமான பின்னணி ‘காதலின் தீபம் ஒன்று’ பாடலுக்குத்தான். படப்பிடிப்பு பெரும்பாலும் முடிந்த நிலையில் இன்னும் ஒரு பாடல் மட்டும் தயாராகாமல் இருந்திருக்கிறது. அதே நேரத்தில் இளையராஜா உடல்நலக் குறைவால் மருத்துவமனையில் அனுமதிக்கப்பட்டு அறுவை சிகிச்சை செய்துகொண்டிருந்தார். பாடல் தாமதமானால் தயாரிப்புக்கு பெரிய நஷ்டம் ஏற்படும் என்பதை பஞ்சு அருணாச்சலம் மருத்துவமனைக்குச் சென்று கூறியிருக்கிறார்.

அறுவை சிகிச்சையிலிருந்து குணமடைந்து கொண்டிருந்ததால் இளையராஜாவால் ஹார்மோனியத்தில் அமர்ந்து வாசிக்க முடியாத நிலை. இருந்தும் இசை உதவியாளர்களை மருத்துவமனைக்கே அழைத்து, படுக்கையில் இருந்தபடியே விசில் அடித்து மெட்டை உருவாக்கிக் காட்டியிருக்கிறார். பாடலுக்கான இசைக்குறிப்புகளையும் தயார் செய்து கொடுத்து, பதிவு செய்யச் சொன்னார். எஸ்.பி.பாலசுப்பிரமணியம், எஸ்.ஜானகி பாடிய பதிவை மருத்துவமனையில் இருந்தபடியே தொலைபேசியில் கேட்டு, தேவையான திருத்தங்களையும் இளையராஜா சொன்னதாக பதிவு செய்யப்பட்டுள்ளது.

அப்படி மருத்துவமனை படுக்கையில் விசிலில் பிறந்த பாடல்தான் ‘காதலின் தீபம் ஒன்று... ஏற்றினாளே என் நெஞ்சில்’. படம் வெளியான பிறகு பாடல் மிகப்பெரிய வெற்றி பெற்று 1980களின் பிரபலமான காதல் பாடல்களில் ஒன்றாக மாறியது. வயலின் உள்ளிட்ட பின்னணி இசைக்கான சில குறிப்புகளையும் இளையராஜா விசிலிலேயே உதவியாளர்களுக்கு விளக்கியதாக பின்னர் வெளியான நினைவுகள் கூறுகின்றன. உடல் நலம் பாதிக்கப்பட்ட நேரத்தில்கூட தயாரிப்பு நின்றுவிடக்கூடாது என்பதற்காக அவர் செய்த அந்த வேலை, பாடலின் வெற்றியுடன் இன்னும் சுவாரசியமான வரலாறாக மாறியது.

1984 ஏப்ரல் 20ஆம் தேதி வெளியான ‘தம்பிக்கு எந்த ஊரு’ பெரிய வெற்றியை பெற்றது. “இந்தப் படம் எனக்கு செட் ஆகாது” என்று ஆரம்பத்தில் ரஜினியே சந்தேகப்பட்ட அதே பாலு கதாபாத்திரம், அவரது நகைச்சுவை திறனை குடும்ப ரசிகர்களிடம் இன்னும் வலுவாக கொண்டு சென்றது. பின்னர் ரஜினியின் பெரும்பாலான வணிகப் படங்களிலும் அதிரடியுடன் நகைச்சுவையும் தவிர்க்க முடியாத அம்சமாக மாறியது. பஞ்சு அருணாச்சலம் அப்போது சொன்ன “கடைசி படம் வரை காமெடி செய்யாமல் இருக்க முடியாது” என்ற வார்த்தை கிட்டத்தட்ட தீர்க்கதரிசனமாகவே மாறியது.

“மாட்டு சாணி அள்ளுகிறேன்... மாட்டு வாலை தூக்குகிறேன்... இது என்னோட படமா?” என்று ரஜினியே நம்பாமல் கேட்ட படம். “ஓடலைன்னா நஷ்டத்தை நான் ஏற்றுக்கொள்கிறேன்; நீ நடி” என்று பஞ்சு அருணாச்சலம் பிடிவாதமாக நின்றார். இன்னொரு பக்கம் மருத்துவமனையில் அறுவை சிகிச்சை முடிந்து படுத்திருந்த இளையராஜா விசிலிலேயே மெட்டு போட்டு ஒரு காலத்தால் அழியாத காதல் பாடலை கொடுத்தார். ரஜினி நம்பாத கதையும்... மருத்துவமனையில் பிறந்த பாடலும்... இறுதியில் இரண்டுமே சூப்பர் ஹிட் — அதுதான் ‘தம்பிக்கு எந்த ஊரு’!

தேன் மொழி